三笘薰今季為白禮頓上陣40場入11球及3次助攻。(Getty Images)
德甲冠軍拜仁慕尼黑原本計劃今夏收購利華古遜中場科利安華迪斯，但呢位德國國腳選擇加盟利物浦，拜仁惟有另覓人選，根據德國《圖片報》爆料，拜仁打算用4,500萬歐元(約4億港元)買白禮頓翼鋒三笘薰，實行下季同米高奧利斯雙翼齊飛。
據悉拜仁現時3位左翼球員京士利高文、利萊辛尼、基拿比表現，都未能達到教練高柏尼要求，導致邊路進攻失衡，往往靠右翼米高奧利斯發動進攻，呢位法國國腳今季踢34場德甲入12球及15次助攻。
高柏尼希望簽入1位具級數左翼球員，並睇中三笘薰，近期多次派人觀察佢表現。呢28歲日本國腳今季為白禮頓上陣40場入11球及3次助攻，佢擅長盤球突破，拜仁簽入佢，屆時同米高奧利斯雙翼齊飛，可以大大提升進攻效率。
三笘薰剩下2年合約，遲遲未完成續約，據報白禮頓打算今夏高價出售佢，早前已傳出有沙特豪門想收購呢位猛將，拜仁依家加入爭奪，就要睇三笘薰想加盟大球會踢歐聯，抑或向錢看，去中東挖金。